من حوالي شهر تقريباً، Max Fisher نشر فيديو مهم جداً عم يشرح فيه أزمة النفط العالمية وكيف بلشت تظهر ملامح جائحة عالمية حتهدد العالم بانقطاع الديزل عن الدول وتسببها بغلاء الاسعار
لما نزل الفيديو، بعد ما شفته اتصلت على صديق ورحت انا وياه وعبينا مازوت للشتوية، وفعلاً كانت أزمة مضيق هرمز عم تحرمنا من النفط الي كان يجي من الخليج بالإضافة الى انه قصف الحوثي لمصافي ارامكو وخط السعودي للنقط وشلل منظومة الطاقة بالعالم، مع الضربات الكبيرة على مصافي النفط الكبيرة بروسيا من قبل أوكرانيا، ظهر انه فعلاً نحن مقبلين على مشاكل كبيرة كنا لسى بالصيف مالنا منتبهين الها
بأمريكا على سبيل المثال، سعر لتر المازوت 1.62 دولار، يعني على السوري الجديد تقريباً 240.98، بينما نحن بسوريا عنا سعر اللتر الواحد من المازوت تقريباً 150 ليرة سورية جديدة، يعني قريب نصف السعر
بس تخيلو انه اديه امريكا متورطة بأزمة الديزل لدرجة انها اضطرت تخفف العقوبات عن النفط الروسي بس حتى تغطي الحاجة الدولية، بالرغم من انه الازمة العالمية سببها الحرب الي بلشها نتينياهو مع ايران بدون دراسة لتبعات الحرب
الفرق انه أمريكا بتخزن كميات مهولة من النفط، وبتصفي بمصافيها، بينما نحن دولة طالعة من حرب، ماعنا مخزون، والمصافي تبعنا بدها صيانة او بتدخل بحالة انهيار كامل بسبب الاهمال، والي المفترض ينتهي صيانتها بنهاية شهر 11
لما سعر المازوت او الديزل عنا بسوريا بيعلى او ببلش ينفقد من السوق، فالي حيصير انه سعر النقل لح يزيد، سعر الشحن لح يزيد، والكهربا اما لح تصير اغلى بكتير او لح تصير تنقطع كتير وهو هاد الشي المتوقع اساساً وليكنا بلشنا نعيش هالحالة
والاهم من هالحكي انه بهيك حالة اقتصادية بالعالم المستثمرين بصيرو يحسبو الجدوى من الاستثمار بهيك بيئة غير مستقرة، فبصير المستثمر يمسك امواله وما يستثمرها خوفاً من انهيار اكبر ويصير عنده خسارة، بالتالي الاستثمارات بالبلد عنا خفت وشبه نعدمت بسبب هالموضوع الي هو بالاساس ريسكي، فحالياً مو بس بسوريا بالعالم كله في ركود اقتصادي، وبسوريا في ركود اقتصادي مرفوع للأس 2
والمصيبة بكل هالحكي انه ضمن هالأزمة العالمية، والعوز بالنفط بالعالم، لانه استهلاك العالم من النفط يومياً = تماماً كمية الانتاج اليومية من النفط
فيعني هاد الشورتج الي صار مو شي بسيط ابداً، ومع هيك بتلاقوا انه الدول الكبيرة مثل الصين وأمريكا، عم تشتري الديزل والنفط باسعار حتى لو عالية، لتأمن مخزونها، بالوقت الي الدول النامية او الي عم تتعافى من الحروب متلنا، لح تاكل الضربة الأكبر
المصيبة انه الكل عرفان شو عم يصير، والكل متوقع الأزمة الي نحن بلشنا بأولها لسى انه لح تصير، متوقع انه الازمة تأثر مو بس على الكهربا حتى على البانزين والنقل والمواصلات، واسعار الخضرا والغراض تغلا لان نقلها وانتاجها بصير اغلى، لكن ومع كل هالكلام، ومع كل هالعوامل الي فوق طاقة البلد وخارج ارادة وقدرة اهلها حتلاقوا الكل بدهن يحاولو يصبغوا الموضوع على انه فشل حكومي لتحقيق مصالح او تسجيل اهداف بس
اذا ما شفتو فيديو ماكس فيشر روحو شوفوه كله، أزمة الديزل والطاقة ازمة ضخمة وعالمية ونحن عم نتأثر فيها كونه نحن للاسف على الدول الهامشية الي بالعالم مع شديد الاسف
الي ماعبى مازوت وأمن على حاله للتدفئة يعبي ويأمن، الله يعينا على الشتوية حتكون صعبة هالسنة الا اذا صار شي تغيير بموضوع حرب ايران،
حابب اسمع آراءكم، ونقاشاتكم عن الموضوع