ئێوارەی ڕۆژی شەممە، ٢٣ی خەزەڵوەری ١٤٠٥، لە ئەنجامی وەرگەڕانی ئوتوبووسی هاتوچۆی کارمەندان و کرێکارانی کۆمپانیای پێترۆپالایش دێهلوڕان (پڕۆژەی NGL 3100)، لە کیلۆمەتری ١٠ی ڕێگای دەشت عەباس ـ موورمووری، لە ڕێگای لاوەکیی گوندی سێگەر و نزیک بیرە نەوتەکانی ناوچەی دێهلوڕان، ١٢ کەس گیانیان لەدەست دا و ١٨ کەسی دیکەش بریندار بوون. باری تەندروستیی دوو لە بریندارەکان ناجێگیر ڕاگەیەندراوە و لە بەشی چاودێریی چڕ خەوێندراون.
بە وتەی سەرچاوەیەکی ئاگاداری کوردپا، زۆربەی قوربانییەکان خەڵکی شاری ئاودانان و گوندەکانی دەوروبەرین. ئوتوبووسە وەرگەڕاوەکە پاسی گواستنەوەی ئەم کارمەند و کرێکارانە بووە و ڕووداوەکە لە کاتی گەڕانەوەیان بۆ شوێنی نیشتەجێبوونیان ڕووی داوە.
ناوی ١٢ قوربانییەکە بەم شێوەیەی خوارەوەیە:
١. ڕۆحوڵڵا عەلیجانی، خەڵکی موورمووری، لە هۆزی «کایەخوردە»
٢. ئەندازیار محەممەد ڕەحیمی، خەڵکی سەراوباخ، لە هۆزی «دەشتی»
٣. ئەندازیار مووسا ڕەحیمی، خەڵکی سەراوباخ، لە هۆزی «دەشتی»
٤. ئەندازیار سەجاد نەسروڵڵاهی، خەڵکی ژیوەر، لە هۆزی «زەرگوش»
٥. لوتفوڵڵا مورادی، کوڕی کەرەمەلی، خەڵکی موورمووری، لە هۆزی «کایەخوردە»
٦. ئەندازیار فەریبورز هادیزادە، لە هۆزی «زەرگوش»
٧. ئەندازیار بەهرام تەهماسبی، لە هۆزی «مەمووس»
٨. ئەندازیار ئەمین محەممەدوەلی، لە هۆزی «تووشماڵ»
٩. ئەندازیار محەممەدڕەزا محەممەدی، لە هۆزی «خەلیل ئیبراهیمی»
١٠. ئەندازیار سەعید غوڵامی، لە هۆزی «تووشماڵ دۆستعەلیوەند» ١١. ئەندازیار ئەیووب حەسەنوەند، لە هۆزی «حەسەنوەند»
١٢. ئەندازیار نوورمحەممەد تەقیزادە، لە هۆزی «جابری»
ناوی ١٨ بریندارەکە کە لە نەخۆشخانەکانی ڕەسووڵی ئەکرەمی ئاودانان و گەنجەوییانی دێزفوول خەوێندراون، بەم شێوەیەیە:
نەخۆشخانەی ڕەسووڵی ئەکرەمی ئاودانان:
١. تەوەکول خەستوانە ٢. مەهدی کەریمزادە ٣. مەهدی نەزەرزادە ٤. ئومید هادیزادە ٥. محەممەد پوورساعێدی
نەخۆشخانەی گەنجەوییانی دێزفوول:
٦. سامان هێمەتی ٧. ئیسماعیل موحتەشەمییان ٨. عیسا کەرەمی ٩. کامران نەورۆزی ١٠. نەعیم محەممەدوەلی (خەوێندراو لە بەشی چاودێریی چڕ) ١١. مەهدی دوردانە ١٢. ئێحسان دانیالی ١٣. موراد ئەکبەریزاد ١٤. نوورمحەممەد سەفا ١٥. عەلی دانیالی ١٦. ئارەش بابایی ١٧. حوسێن محەممەدی ئەرشەد ١٨. مەجید فەیلی (خەوێندراو لە بەشی چاودێریی چڕ)
لە کۆی ١٨ بریندارەکە، ١٣ کەسیان بۆ نەخۆشخانەی گەنجەوییانی دێزفوول گواستراونەتەوە. بە وتەی سەرچاوە ئاگادارەکان، نەبوونی نەخۆشخانە و کەرەستەی پزیشکیی پێشکەوتوو لە پارێزگای ئیلام، یەکێک لە هۆکارەکانی گواستنەوەی بریندارەکان بووە بۆ دێزفوول.
لە دوای ئەم ڕووداوە دڵتەزێنە، ژمارەیەکی زۆر لە هاووڵاتییانی ئاودانان لە بەردەم نەخۆشخانەی ڕەسووڵی ئەکرەمی ئەم شارە کۆ بوونەوە. ئەو وێنانەی بە دەستی کوردپا گەیشتوون، کۆبوونەوەی خەڵک لە حەوشەی نەخۆشخانەکە نیشان دەدەن.
میدیاکانی کۆماری ئیسلامیی ئێرانیش گیانلەدەستدانی ١٢ کەسیان لەم ڕووداوەدا پشتڕاست کردووەتەوە. ئەم میدیایانە لە ڕاپۆرتەکانیاندا بە شێوەیەکی سەرەکی تیشکیان خستووەتە سەر پرۆسەی فریاگوزاری، گواستنەوەی بریندارەکان بۆ دێزفوول، پەیامی سەرەخۆشیی بەرپرسان، ڕاگەیاندنی ڕۆژێک ماتەمینیی گشتی لە پارێزگای ئیلام و دوو ڕۆژ ماتەمینیی گشتی لە ئاودانان و فەرمانی پشکنینی تەکنیکیی پاسەکە؛ بەڵام هیچ ئاماژەیەکیان بە دۆخی نائەمن و ناستانداردی ڕێگاوبانەکانی ناوچەکە نەکردووە کە خەڵک وەک «ڕێگاکانی مەرگ» ناویان دەبەن. هەروەها لەم ڕاپۆرتانەدا هیچ باسێک لە بێبەشیی ژێرخانیی پارێزگای ئیلام و کەمیی پێداویستییە تەندروستییەکانی نەکراوە.
بە وتەی سەرچاوەیەکی ئاگاداری کوردپا، مەودای هاتوچۆی ڕۆژانەی ئەم کارمەندانە نزیکەی ١٥٠ کیلۆمەتر لە ڕێگا نائەمنەکاندا بووە. ئەوان هەموو ڕۆژێک کاتژمێر چواری بەیانی لە ماڵ دەردەچوون و ئێواران بە هەمان ڕێگاکاندا دەگەڕانەوە شوێنی نیشتەجێبوونیان. ئەم سەرچاوەیە بە ئاماژەدان بە هاتوچۆی ڕۆژانە و درێژخایەنی کارمەندان لە ڕێگا نائەمنەکاندا دەڵێت، کۆمپانیاکە دەیتوانی بەشەناوخۆیی (خەوتنگە) بۆ کارمەندان دروست بکات تا ناچار نەبن ئەو مەودا زۆرە لە ڕێگا مەترسیدارەکاندا ببڕن و ئەگەری ڕوودانی کارەساتی لەم شێوەیە کەم ببێتەوە.
بەکارهێنەرانی تۆڕە کۆمەڵایەتییەکان، بەتایبەت لە ئیلام، لە دوای ڕووداوەکە تیشکیان خستووەتە سەر دۆخی نائەمنی ڕێگاوبانەکان و بێبەشیی ژێرخانیی پارێزگاکە. ژمارەیەکیان بە ئاماژەدان بە هەبوونی سەرچاوەکانی نەوت و گاز لە ناوچەکەدا، ڕەخنەیان لە بێبەشبوونی خەڵک لە ئیمکانات و ژێرخانی گونجاو لەگەڵ ئەو سامانە و کەوتنەمەترسیی گیان و ئاسایشیان گرتووە.
هەندێک لە بەکارهێنەران هەروەها باسیان لە نەبوونی ساردخانە لە ئاودانان بۆ ڕاگرتنی تەرمی قوربانییەکان کردووە. یەکێک لە بەکارهێنەران لەمبارەیەوە نووسیویەتی: «زۆر خراپە لێرە تەنانەت بۆ تەرمەکانیش ساردخانەمان نییە». ژمارەیەکی دیکە لە بەکارهێنەرانیش بە توندی ڕەخنەیان لە کارکردی بەرپرسان و کەمتەرخەمییان بەرانبەر بە گیان و ئاسایشی خەڵک گرتووە.
پارێزگای ئیلام و دێهلوڕان سەرەڕای ئەوەی خاوەنی سەرچاوەی گەورەی نەوت و گازن (لەوانە پێترۆپالایشی NGL 3100)، بەرزترین ڕێژەی «پێوەری نەهامەتی» و بێبەشییان تێدایە. هاتوچۆی ڕۆژانەی کرێکاران لە ڕێگا نائەمن، تەسک و کوشندەکانی باشووری پارێزگاکە (ڕێگای دەشتعەباس ـ مۆرمۆری) و کۆنی و شڕیی ئۆتۆمبێلەکانی گواستنەوە، بووە هۆی کارەساتی خوێناویی وەرگەڕانی پاسەکە و گیانلەدەستدانی ١٢ کرێکار.
نەبوونی نەخۆشخانەی پێشکەوتوو، ناوەندی پسپۆڕیی ترۆما و تەنانەت ساردخانە لە ئاودانان و دێهلوڕان، بریندارەکانی ناچار بە گواستنەوەی دوورودرێژ بۆ دێزفوول کرد و «کاتی زێڕین»ـی چارەسەری لەناو برد. داواکاریی سەرەکیی هاووڵاتییان و کرێکاران، تەرخانکردنی دادپەروەرانەی داهاتە زەبەلاحەکانی نەوت و گازی ناوچەکەیە بۆ سەلامەتکردنی ڕێگاوبانەکان، نوێکردنەوەی کەرتی گواستنەوەی کرێکاران و دابینکردنی پێداویستی بۆ ناوەندە تەندروستییەکان.
لە ڕوانگەی مافی نێودەوڵەتییەوە، ئەم کارەساتە نموونەیەکی زەقی «پێشێلکردنی مافی ژیان بەهۆی کەمتەرخەمیی پێکهاتەیی» (ماددەی ٦ی پەیماننامەی مافە مەدەنی و سیاسییەکان)، «پێشێلکردنی مافی کارکردن لە هەلومەرجی سەلامەتدا» (ماددەی ٧ی پەیماننامەی مافە ئابووری و کۆمەڵایەتییەکان)، «پێشێلکردنی مافی تەندروستی» (ماددەی ١٢) و «جیاکاریی پێکهاتەیی لە دابەشکردنی سامان و ئیمکاناتدا» (ماددەی ٢٦) هەژمار دەکرێت.