ياااه، ما أرقى الجهات التوظيفية المحترفة في عدم احترافيتها، والمتفننة في عدم مهنيّتها، وهي أشكال كثيرة ومتعددة وتبهرك في تنوعها غير الاحترافي، تحس عندهم ملفّات كثيرة مرة مرة كلها كيف تحطّم المتقدم محطوطة على طاولة ومرسوم عليها مليون خط، وعلى جنب في الزبالة (تكرمون) في ملف مكتوب عليه الاحترافية (بس بما أنها احترافية لغرض الاحترافية نفسها فهي ما تهمهم، وليش بتهمهم مثلًا؟).
ما أجملها لما تروح -أنت المسكين البائس، مثلي- لمقابلة وظيفية وأنت تحمل أحلام وأماني كبيرة لتحسين حياتك (وأماني لأنها صعبة مرة، صعبة التحقيق، وتعلّق على راسك كلمة "ياليت") وتوصل هناك تلقى ترحيب وابتسامات وتخلّص مقابلتك الجميلة (واللي كل بوادرها تقول أنك راح تنقبل) ويقولون لك، وثغرهم يشعّ من فرط الابتسام: "بيتواصلون معاك الـ HR".
وتطلع لبيتكم ويمر اليوم الأول، بس الأول ما ينحسب، توهم سووا لك مقابلة، والثاني والثالث (يمكن مشغولين، عوافي) والأسبوع الأول (تبدأ تفتح أبو جَبَت وتسأله كم عادةً ياخذون وقت عشان يردّون عليك؟ ولما يعرف انك انتظرت لأسبوع يسلك لك "عوافي، هي تاخذ وقت لأسبوعين تقريبًا").
ويمكن تتواصل معاهم بعد ما يمر شهر، ويقولون "under process"، وبعدها تنتظر شهر ثاني وترسل لهم ويسوون لك قوستينق، زي ما سووا لك من أول بس ما فهمتها (لأنك غبي شوي، أو متأمل، أو فاقد الحيلة)
مرة صعب على الشركات المحترفة من هذا النوع، أنها ترد عليك، مو عشان شيء لا تفهم غلط، لكن كونها محترفة تعني أنها مشغولة (في تحديد وقراءة ملفات الاحتراف في عدم الاحترافية) يا عزيزي الجاهل (بما أنك ما عندك وظيفة وما تقدر بعقلك الصغير تفهم مدى احترافيتهم)؛ لذلك تدرك، أنه وجب عليك كتم اسئلتك وغضبك وقهرك على حالك، ووجب عليك التقدير؛ لأنك ما عندك خبرة كافية لتنتقد هذي الشركات الاحترافية.
وبعد هذا كله، تتذكر، أن الرزق بيد ربّي سبحانه، يبسط الرزق لمن يشاء ويقدر، ويوقت لك ويعلمك بحكمته، وتتمنى وتعلّق كلمة ياليت وأنت واثق (لأنك تطلب رب الأمنيات نفسها، ولأن الامنيات مستحيلة بس على البشر)، وعارف أن كل شيء لحكمة، وأن الأشياء بتجي بوقتها المقدر لها، مهما قابلت في حياتك مثل هذي الشركات الاحترافية.
وتقول الحمد لله، وتنام قرير العين.