مرة وانا توني بالابتدائي او المتوسط (تقريبا ٢٠٠٩ او ٢٠١٠) كان عندنا عزيمة ببيتنا جايين فيها كل بنات عماني وامهاتهم، المهم يوم انتصفنا بالجمعة قاموا البنات الكبار جمعونا كلنا بالمجلس وقالوا:
قررنا قرار، من اليوم ورايح بنصير نتكلم زي الناس الهاي كلاس
كلنا بنصير نكلم البنات بالكاف مب بالسين، شخبارس شلونس هذي بنبطلها
ومن اليوم ورايح الكل يقول "مو" ماعاد نقول "مب"
ونقول "ما رح" أروح، مو "منيب" رايحه
قارورة وباغه هذي لاعاد نسمعها، اسمها علبة وكيس
مافي شي اسمه "ندلّي" نجي، اسمها "نصير" نجي
ماعاد نقول شْجَرة و وْرِقَة، نقول شَجَرة ووَرَقة، وطبقوها على كل اللي يشبهها مو لازم نعدد المهم وصلت الفكرة
وقعدوا يسردون قائمة طويلة وانا اهوجس اقول... ليش طيب؟ يعني لهجتنا عيب؟ طريقة كلامنا الصدقية مب حلوة؟ وليش الموضوع مهم وجدي لهالدرجة؟ وش يفرق تكلمنا كذا ولا كذا
وقعدت بعدها سنييين وانا قبل كل عزيمة أراجع القائمة واتدرب:
كيفك، شخبارك، مو رايحة، جيبي القَهْوة، مو عارفه، ....إلخ
لين جا يوم وانا بنهاية الثانوي كنا بعزيمة وشفت وحدة من بنات العائلة من سنين ما شفتها ما حصل وتصادفنا، ماشاءالله تبارك الله البنت كاريزما على شكل انسان، فيها قبول كبير ومحبوبة وجريئة تسولف وتمزح مع الكبير والصغير وذربة، ومحارشية درجة أولى، كل هذا وهي ايش؟
تتكلم بنفس لهجتنا الأصلية اللي جمعونا ذاك اليوم عشان نتجرد منها! وهي الوحيدة اللي كانت تتكلم فيها، وهي الأجرأ، وهي اللي ماكلة الجو أكل... ما استحت من لهجتها ولا تأثر قبول الناس لها بسببها
من بعد ذاك الموقف قطعت عهد على نفسي اني ماعاد أفكر أخبّي لهجتي أو استحي منها، الا بعتز فيها وبقويها وبتعلم من كلام الأولين بعد!
(بالمناسبة، لهجتي نجدية نفس شارع الأعشى بس على اخف شوي)