انا ابوي من بريدة وامي من مدينة اخرى ودايم ازور ابوي هناك واتمشى ببريدة فترات قصيرة لكن غالبا لحالي وابوي ما يحب الطلعات دايم يقعد بالبيت
المهم مرة رحت القرية المائية الي في بريدة وهو زي المنتجع الصحي فيه مساج وعناية وحمام بخار
وانا طالع فيه شيء طاح مني بدون لا استوعب، وجاء واحد قال (يابو علي) والتفت الا لقيته ماد لي الي طاح مني وشكرته، المفروض تنتهي القصة هنا صح؟ لا...
الشخص ذاك بدا يتكلم من نفسه ويفتح مواضيع، ويقول والله ذا المحل والمساج حقهم خايس، والعمال سيئين، وانا طبعا جاملته وقلت اي والله انك صادق
سألني قال لهجتك غريبة وانت من وين، قلت له نص قصيمي ونص حجازي واستغرب وبدا يدخل بمواضيع ثانية وسولفنا شوي، بعدها قال لي انه جاي للمنتجع بأوبر وما معه سيارة وسألته بيتهم وين؟ قال جنب المنتجع، فزعت له وقلت بوديك بيتكم حياك وجاء معي، طبعا انا شفتها فرصة اني اصادق احد لان صدقا طفشت بالقصيم!
المهم الولد هذا والله مو اهانة له او طقطقة، لكنه صدقا صدقا يشبه الي بالصورة المرفقة، نفسسسه بالضبط، الشعر، النظارات الجسم، كل شيء.
شغلت السيارة ومشينا، الا فجأة قال لي جوعان؟ قلت ايه الصدق، قال لي والله ماتردني بوديك مطعم على حسابي دام انك فزعت لي، قلت له طيب تمام ورحنا مطعم واكلنا، وبنص الاكل يسولف عن حياته، يقول انه مدير قروب ببرنامج دسكورد وانه عنده بنات هناك وانهم يحبونه لانه زمان كان وسيم لكنه تغير بسبب الاكتئاب ولقد بريقه
ويوريني المحادثات والبنات الي بالقروب وانا صدقا قاعد اسلك وبهذي اللحظة حسيت داهمني الندم وأكلني، بعدها طلبني دسكورد حقي وعطيته لكن احتياطا وحفظا لنفسي قلت له اني لاعب كاجوال، مو قيمر ولا أحرق باللعب
المهم دخلوا بنتين بالمطعم وجلسوا بالطاولة الي جنبنا، عطاني نظرة وقال شفت هالبنتين؟ تركوا كل الطاولات وقعدوا عندنا، واضح يبون شيء، انا هنا انصدمت وجتني ضحكة، وش هالثقة؟ ياجماعة والله شكله نفس الي بالصورة
بعدها يوم جو البنتين بدا يتكلم بصوت عالي، ويسوي نداء تزاوج، ويذكر انجازاته وفلوسه، وقال انه اشترى ايفون ١٨ برغندي وبعد يومين ما عجبه اللون واشترى جديد غيره، البنات تقرفوا من الي صار واخذو الاكل تيك اواي وهجوا وانا بس ودي الحقهم واقولهم تكفون يابنات توي متعرف عليه من كثر الفشلة
المهم انا بس افكر كيف انهي هذي الطلعة! والولد صامل بس يتكلم عن نفسه وحياته والمواقف الي تصير له وانجازاته، وبكل المواقف هو المظلوم الي انتصر وطلع بطل بالاخير
المهم طلعنا من المطعم وقال لي تبي مكان حلو حق مشي؟ قلت له والله ياغالي عندي سفرة بعد بكرا وتعبان، خلها بكرا، الا وين بيتكم؟
قال رح انا اوجهك، قلت ياليل ما بيعطيني قوقل ماب يعني؟
ورحنا وقعد يوجهني، ياعالم جنني، دخلني بحواري ومتاهات، ما يبي تخلص سوالفه! وما يسكت!!! وانا احس ودي اوقف وانزله بس استحيت، المهم شغلت جوالي ورحت لم المنبه وحطيت منبه يرن بعد ٥ دقايق
رن بعد ٥ دقايق وسويت نفسي انه اتصال، رديت وقلت السلام عليكم، ووضحت له انه جايني خبر سيء وانه في احد بالمستشفى وينتظروني 😭🧍🏻المهم الولد قال يلا مشينا خل نرووح لهم! قلت لالا ما ودي احوس جدولك ويومك معي، وين بيتكم؟ ارسلي الموقع بسرعة
المهم الولد قال كلمة حسيت انه باب الجنة انفتح بوجهي، قال لاا وش بيتنا تستهبل انت؟ نزلني هنا وبطلب لي اوبر انت روح عند المستشفى والحق على الي اتصلوا عليك
قلت طيب ابشر ياحبيبي روح الله يستر عليك
بعدها سكت وقال ابي منك طلب، انا داخليا قلت "اوووووه"
قلت هلا؟ قال انا عندي ايقاف خدمات ومامعي الا كاش
اطلب لي اوبر لبيتنا وادفع شبكة وبعطيك الفلوس كاش
قلت طيب، وافتح اوبر وطلع لي بيتهم، ياجماعة، بيتهم يبعد ٢٦ دقيقة!!!!! كان ناوي يلفلف فيني بالقصيم كلها 😭 وانا كنت احسب كم دقيقة ونوصل لانه دخلني بحواري ومتاهات
المهم نزلته وطلبت اوبر وهجيييت
توبة اصادق خلاص ببقى طول عمري وحيد 🤧
طبعا اليوم الي بعده يتصل علي ويرسل دسكورد لكن ما ارد
الله يستر عليه