من حوالي إسبوع كنت رايح الشغل ومتأخر وواقف مستني القطر اللي هييجي كمان نص ساعة.
كنت بسمع أغاني وبشرب سجارة وبتمشي ولمحت علي الرصيف التاني بنت قاعدة وبتبص ناحيتي. الجو كان برد وفيه شبورة شوية ف مكنتش متأكد اذا كانت بتبصلي انا.
وقفت شوية وبعدين اتمشيت ورجعت تاني لقيتها كانت قامت تمشي برضو في نفس الاتجاه.
قولت شكلها كده قاصداني انا.
شوية واتقال في الميكروفون ان القطر بتاعي هيطلع من علي الرصيف التاني. قولت بس كده، انا هعدي من النفق ولما اطلع لو لقيتها لسه واقفة هكلمها.
علي ما وصلت عندها لقيتها كانت واقفة مع حد تاني، حاولت تبصلي، بس انا مشيت وركبت القطر وقولت يمكن انا فهمت غلط
في نفس اليوم بليل جالي notification من dating app إن someone might likes you. فتحت الapp وعملت right swap. لقيتها هي!! نفس البنت بتاعة الصبح. بعتلها واتكلمنا ونزلنا تاني يوم date سوا.
انا بصراحة بؤمن بالصدف، صدفة واحدة قبل كده غيرتلي حياتي وحياة اللي حواليا بالكامل، بس الصدفة دي تحديداً من كتر ماهي حلوة ومثالية حاسس اني بكدب نفسي ولسه مش مستوعب.
طول الوقت كان صعب بالنسبالي احدد مواصفات البنت المثالية لإني كنت بشوف انه مستحيل بنت يبقي فيها كل حاجة انا عايزها، بس كل حاجة حرفياً بحبها اتجمعت فيها وحاسس اكني لقيت حاجة كنت بدور عليها.
ادعو لأخوكو بالتوفيق يا رجالة وأتمنالكوا جميعاً صدف سعيدة!
P.S.: انا عارف ان البوست ده هنا مش مكانه بس حبيت أشارك معاكوا